Kanpanny pour lalkol

En pti lobzervasyon dan en distrik kot in touzour ganny dominen par sa parti me ki ozordi i annan en gro batay pour al fer fas avek.

E menm an fas avek defet, aktivis sa distrik i kontinyelman fer bann siporter e zabitan an zeneral fristre avek lafason ki kanpanny dan sa distrik pe ganny fer.

Nou vwar kot zot kandida ki ti menm pres pou ganny diskalifye, pa menm konnen kimannyer en kanpanny politik i merit ganny fer. Dan en lakour kot i annan plizyer endividi, i pase e koz zis avek met lakour. Lezot i ganny inyore akoz zot in ganny klase anba ‘zot pa ek nou’. Me eski sanmenm sa ki zot lider pe koz lo la?

Bann zabitan ki’n vire e al siport en lot parti i ganny zoure. Kanpanny i ganny fer par pas en papye kot serten lakour e met anba laport. Zabitan sa distrik pe not byen. Zot fristre letan zot pe vwar sa bann menm dimoun pe zis gaspiy larzan kanpanny dan sa moman difisil kot bokou fanmiy pe soufer, bokou fanmiy ki zot ti kapab ede, me larzan pe ganny zis gaspiye dan parti e lalkol lo en baz toulezour.

Sa distrik i enn ki ranpli avek problenm sosyal, ki i annan menm zot bann aktivis ki pe mars avek zot pe fer kanpanny ki dan bokou difikilte finansyel, zanfan i ganny neglize pandan ki manman pe fer kanpanny e pe bwar. Eski se sa bann tel dimoun ki nou pou kontinyen les zot bar lavenir nou pei?

Zot bann elektora in perdi konfyans dan zot e zot lider. Ankor en vot pour zot se ankor 5 an martir e retar.