Bernard St.Ange i en zonm ki’n determinen pour anmenn en sanzman Perseverance

Bernard St.Ange i en zonm ki’n determinen pour anmenn en sanzman dan kominote Perseverance. Sa distrik i en landrwa kot i annan bokou problenm sosyal e ki pe mont lo en nivo vreman alarman. Sa bann problenm in zis agrave akoz bann lotorite konsernen pa’n fer preski nanryen pour aport solisyon.

An rezilta sa, nou bann zanfan dan sa distrik pe ganny bokou afekte. Sitiasyon ki pe annan dan lekol sitie dan sa distrik i tre enkyetan. Sa bann problenm sosyal pe kontinyelman devid dan sa de lekol, sirtou dan lekol primer.

Bann ansennyan in ariv lo en pwen kot zot in nepli konnen ki pou fer e kot pour al rod led. Sa bann zanfan pa enterese avek laprantisaz e zot afekte bann ki anvi aprann. Ansennyan i ganny menase e zoure avek zanfan. 

Eski nou pou kontinyen annan sa bann menm konportman? Eski nou pou les nou bann ansennyan kontinyelman pe soufer? 

Zabitan Perseverance, nou’n annan en Lasanble Nasyonal ki menm nou ti napa reprezantan ladan, nou pan vwar okenn manm pe debat pour nou. Perseverance ti ganny mete akote, menm si zabitan sa distrik ti met donn lanmen vote pour met zot dan sa Lasanble Nasyonal. Eski la nou’n pare pour met ankor menm group dimoun ki pan fer nanryen pour nou?

Perseverance i merit ganny ekipe avek bann servis esansyel ki kapab donn lanmen retir sa bann problenm ki pe detri lape e stabilite dan nou distrik. Nou merit annan en sant spesyal ki pour kapab reabilit sa bann zanfan avek en tel move konportman. Annou rode kote zot problenm i ete e kwa ki pe fer zot koumsa. Nou pa pou kapab kontinyelman pe zis apel biro sosyal ki pa pe fer nanryen konkret pour ede, e ki apre nou pa antann nanryen lo sa bann ka. Annou realize ki in plis ki ler ki nou pran bann aksyon ferm.

Annou pa vot pour en dimoun ki annan en bi pour sa kominote e ki konn soufrans bann zabitan menm bann ansennyan. Plan One Seychelles pour Perseverance i kler. Annou fer li vin sa distrik ki i merite.